Dag 13 van die Grendelstaat

-
In 1984 skryf John Deacon, die baskitaarspeler van Queen die trefferliedjie – I Want To Break Free.
Nou sit en wonder ek – het hulle iets geweet wat ons gemis het? Hoe bitter graag WIL ons almal nou uitbreek!
Ons sit in ons huise vasgekluister - Corona Krygsgevangenes. Ons hou onsself besig so goed ons kan maar dit verander nie die feite hiervan nie.
Fisies afgesonder van alles en almal wat nie saam met jou in jou “sel” leef vir die 21 dae nie.
Ons grense, ons hele wêreld, strek skielik net tot by die motorhek of die voordeur. Daarbuite loop ‘n mikroskopiese onding rond. Ons kan hom nie sien nie maar boeta, ons is so terdeë bewus van hom! Sy tentakels sny diep deur die die hart van Die Samelewing soos ons dit geken het. En lank nadat die mensdom ophou gons het oor Covid-19 gaan sy gevolge steeds met ons wees. Sommiges gaan rou oor geliefdes wat hulle verloor het. Ander oor inkomstes, oor lewenswyses, oor besittings, oor besighede.
Of oor hulleself.
Oral waar jy kyk sien en lees jy oor dit. Mense beveel ons heeldag aan – klim af van sosiale media af, dit gaan jou net gek maak.
Hulle is nie verkeerd nie.
Wat hulle nie in ag neem met so ‘n swart en wit argument nie, is dat sosiale media skielik vir massas mense ‘n reddingsboei geword het.
Dit laat mense voel daar is lewe buite hulle tronkmure, laat hulle besef hulle is nie alleen midde in die storm nie, laat hulle deel voel van ‘n groter geheel.
Sosiale media is nou ‘n belangrike konneksie.
Vir baie mense so noodsaaklik as wat dit ‘n tweesnydende swaard is.
Die behoefte van die Krygsgevangenes van Corona om gekonnekteer te voel aan die buitewêreld is nou baie groter en sterker as om jouself nog meer af te sny as wat jy reeds is.
Vir nou sien baie net die slegte van hierdie wind van verandering. Want ons leef in dit en ons is emosioneel daarin vasgevang.
Hopelik gaan ons ook juig oor nuwe geleenthede, nuwe uitdagings, ‘n nuwe toekoms.
Hopelik gaan mense mekaar meer waardeer hierna.
Maar tot dan….
WE JUST WANT TO BREAK FREE!!!
Riaan Coetzee
Kopiereg
8 April 2020

Comments

Post a Comment

Popular posts from this blog

Dag 48 van die grendelstaat

-
Dis nou regtig genoeg. Vandag het die afgelope 47 dae my net ingehaal soos 'n wafferse Usain Bolt terugvegpoging. Maar instede van my net verbysteek het hy my gepooitjie en toe met sy enorme nommer 15 spykerskoene herhaaldelik oor my geloop en sommer 'n paar skoppe in my ribbes ingekry terwyl hy besig was met my. Sowat van 'n gemoedsbekakking het ek lanklaas in my lewe beleef. Die hele tydperk wat ons ingekerker was bly ek nog 'n glimlag van êrens af opdiep, bly ek soekend na positiewe dinge wat my kan opbeur, en kon ek grotendeels daarin slaag. Want dis nodig en ek is veronderstel om tough te wees en ek het darem 'n bed om in te slaap en kos in my maag en die son skyn en daar is memes met positiewe boodskappe en memes wat my vertel ek is basies net 'n klaende druipnat uilskuiken wat hopeloos te maklik kla want daar is soveel mense wat alles verloor het of niks het om mee te begin nie of wat soveel erger ly so as ek 'n ware man is sal ek net aanhou ...
Read more

Die Regte Rooikappie En Die Wolf

-
Eens op ‘n tyd was daar hierdie dogtertjie gewees wat in Feetjieland, reg langs die Towerwoud, gewoon het.  Eintlik was sy blond maar sy het heeldag met so ‘n rooi mussie op haar kop geloop met die gevolg dat almal in Feetjieland en die Towerwoud haar toe Rooikappie begin noem het.  Vreeslike fraai kind, en tog so lief vir haar Ouma. Ouma het in die nabygeleë Towerwoud gewoon, nie ver van die Houtkapper af nie want hulle twee het saans saam TV gekyk. Survivor was hoog op die lys want die bos was ook maar gevaarlik.  Een goeie dag kry Rooikappie toe ‘n sms van Ouma af waarin sy vra of sy nie asseblief vir haar ‘n paar goedjies uit die dorp sal saambring nie, en dan eet sy sommer middagete saam met Ouma en die Houtkapper. Ouma voel bietjie siekerig en lê bietjie in die bed. So gesê so gedaan, en Rooikappie is toe daar weg na die naaste – en enigste – Spaar in die dorp. Spaar, want in Feetjieland kry jy nie ‘n franchise van die meer bekende winkel groep in menseland ...
Read more