Dag 15 van die Grendelstaat

-
Oftewel Dag 1 van die Verlenging van die grendelstaat
Ons steier soos ‘n voosgeslane bokser. Gisteraand het die president afgekonding dat die hele ding verleng word met nog twee weke.
Die atmosfeer is gedemp, somber. Niemand weet werklik wat om daarvan te maak nie, wat om daarmee te maak nie, of wat de donner om volgende te maak nie.
Dis Paasnaweek. En die paaseiers is vrot.
Ons probeer asemhaal. Ons probeer net een tree voor die volgende een gee. Ons maak simpel grappe, soos ons maar altoos doen in somber en moeilike tye. En dit laat ons lag maar selfs ons lag is vandag effe gedemp.
Elkeen probeer maar net om die hele ding te verwerk op sy of haar eie manier. Party praat, ander huil, party soek enige ontvlugting wat hulle kan kry, ander kruip in hulle dop in en wil net stil wees. Sommiges skryf daaroor.
Enige iets wat mens net besig hou – al is dit net nominaal besig.
Gemoedsbekakking.
Ek wil regtig nie vandag hoor hoe wonderlik die president is nie. Of hoe ministers 30% van hulle weelderige salarisse afstaan nie. Daar is ‘n swetterjoel mense wat baie baie meer as dit verloor.
Bly eerder net fokken stil asseblief. Ek sukkel om te lofsang terwyl die haaie besig is om aan my voete te vreet.
Ek wil nie samesweringsteorieë hoor nie. Ek wil nie hoor hoe positief jy is nie, of hoe ongelooflik voorbereid en hoe jy eintlik al lankal uitsien na so ‘n verandering sodat jy tog net leedvermakering vir almal kan vertel hoe cool jy is nie. Bly eerder net stil.
Ek wil nie eintlik eers hoor hoe in ons moer in ons is nie – ek weet.
Moenie vandag vir my vertel van silwer randjies en nuwe beginne en versies stuur en positiewe kwotasies in my gesig gooi van mense wat lankal dood is nie. Bly eerder net stil.
Ek wil vandag net probeer my ewewig terugvind. En ek moet dit by myself doen. Moenie vir my vertel geluk word net in jouself gevind nie – ek fokken weet.
Dalk sal ek more weer met jou daaroor gesels.
Vandag wil ek net asemhaal. En tot verhaal kom. Ys teen my kennebak hou waar die hou geval het wat my voete onder my uitgeruk het.
Ek is Suid Afrika, en ek voel vuisvoos.
Riaan Coetzee
Kopiereg
10 April 2020

Comments

Post a Comment

Popular posts from this blog

Dag 48 van die grendelstaat

-
Dis nou regtig genoeg. Vandag het die afgelope 47 dae my net ingehaal soos 'n wafferse Usain Bolt terugvegpoging. Maar instede van my net verbysteek het hy my gepooitjie en toe met sy enorme nommer 15 spykerskoene herhaaldelik oor my geloop en sommer 'n paar skoppe in my ribbes ingekry terwyl hy besig was met my. Sowat van 'n gemoedsbekakking het ek lanklaas in my lewe beleef. Die hele tydperk wat ons ingekerker was bly ek nog 'n glimlag van êrens af opdiep, bly ek soekend na positiewe dinge wat my kan opbeur, en kon ek grotendeels daarin slaag. Want dis nodig en ek is veronderstel om tough te wees en ek het darem 'n bed om in te slaap en kos in my maag en die son skyn en daar is memes met positiewe boodskappe en memes wat my vertel ek is basies net 'n klaende druipnat uilskuiken wat hopeloos te maklik kla want daar is soveel mense wat alles verloor het of niks het om mee te begin nie of wat soveel erger ly so as ek 'n ware man is sal ek net aanhou ...
Read more

Die Regte Rooikappie En Die Wolf

-
Eens op ‘n tyd was daar hierdie dogtertjie gewees wat in Feetjieland, reg langs die Towerwoud, gewoon het.  Eintlik was sy blond maar sy het heeldag met so ‘n rooi mussie op haar kop geloop met die gevolg dat almal in Feetjieland en die Towerwoud haar toe Rooikappie begin noem het.  Vreeslike fraai kind, en tog so lief vir haar Ouma. Ouma het in die nabygeleë Towerwoud gewoon, nie ver van die Houtkapper af nie want hulle twee het saans saam TV gekyk. Survivor was hoog op die lys want die bos was ook maar gevaarlik.  Een goeie dag kry Rooikappie toe ‘n sms van Ouma af waarin sy vra of sy nie asseblief vir haar ‘n paar goedjies uit die dorp sal saambring nie, en dan eet sy sommer middagete saam met Ouma en die Houtkapper. Ouma voel bietjie siekerig en lê bietjie in die bed. So gesê so gedaan, en Rooikappie is toe daar weg na die naaste – en enigste – Spaar in die dorp. Spaar, want in Feetjieland kry jy nie ‘n franchise van die meer bekende winkel groep in menseland ...
Read more