Dag 4 van Suid Afrika se Grendelstaat

-
So dit is dan min of meer hoe gally slawe tydens die Romeinse ryk gevoel het waar hulle, vasgeketting op houtbankies, dag in en dag uit moes sit en roei vir oorlewing.
Onseker, verward, ongebalanseerd, vraend, soekend, bang. Die slawemeester het jou vasgeketting, vir jou ‘n swaar roeispaan in die hand gestop en in jou ore gegil – ROEI BLIKSEM!! En dis AL wat jy mag doen totdat EK vir jou ‘n ander opdrag gee!!!
Die nuwe dag breek. Jy gaan deur jou lysie doen dinge – asemhalings oefeninge, gryp die sandsak en begin sy gal werk, maak koffie, eet iets vir ontbyt, luister musiek, stort, swem, lees, skryf, Gesigboek, tob, kyk videogrepe, steek die hond se bene weg want jy is verveeld, slaap, doen dalk werkies in en om die huis.
En herhaal.
Alles dinge wat tydens vakansie heerlik voel, maar in hierdie tye wanneer die winde van verandering aangehuil kom soos ‘n trop uitgehongerde wolwe, voel dit net so effens minder na ontspanning of hoe?
Dit voel ‘n bietjie geforseerd. Jy doen dit want dit is nodig en dit help jou om hierdeur te kom, maar dit voel nie heeltemal soos ontspanning nie. Dalk omdat jy weet jy gaan more die siklus herhaal?
Ek vermoed die grootste bydraende faktor tot die melankoliese gevoel is die feit dat jy letterlik oornag gestroop is van feitlik al jou regte en vryhede.
Ja, ek weet dis oor die virus en omdat almal in vrees lewe dat dit die bevolking van die Aarde gaan halveer en dat ons na afloop uitgelewer is aan die boosheid van 5G en so aan.
Maar dink daaraan – selfs al besluit jy om vir ‘n langnaweek net met Jan Tuisbly se karretjie te ry en nie te beweeg nie weet jy dat jy in jou motor kan klim en gou ry om ‘n koffie te gaan drink of om jou brandewyn versameling aan te vul. Jy weet as die gevoel jou beetpak kan jy sonder om twee keer te dink daaraan, vinnig oor die straat stap en die buurman se boormasjien leen.
Skielik mag jy dit nie eers doen nie. Die kleinste aspekte van die betekenis van Vryheid is nie deel van hierdie geforseerde vakansie nie. Jy mag grotendeels net op jou bankie vasgeketting sit en roei.
En dit is waarskynlik die enkele grootste struikelblok om te oorwin.
Dis ‘n baie onwerklike gevoel en ons is nog maar besig om stadigaan te prober gewoond raak aan hierdie nuutjie. Dit bly voel of ek ‘n onwelkome byspeler in ‘n baie swak geproduseerde rolprent is.
Maar oorwin moet ons – tye van verandering is daar om gebruik te word.
Om jouself weer te vind, om jouself oor uit te vind, weer te bepaal wat belangrik is in jou lewe, wie belangrik is, watter ander rigtings daar vir jou is om in te slaan na afloop hiervan, ontslae te raak van slegte gewoontes en dit te prober vervang met goeies, lyste te maak van dit wat jy het waarmee jy kan werk.
Nieteenstaande die geroffel van dreigende onheilstromme wat ons heeldag wil toetrek met ‘n donker kombers van wanhoop behoort ons hierdie tyd gebruik om ons denke dienooreenkomstig aan te begin pas sodat ons selfs regkry om te begin uitsien na nuwe uitdagings wat wag.
Dit ‘n tyd vir baie introspeksie.
Ons moet hierdie Mensdom Toets wys gebruik.
Kopiereg
Riaan Coetzee
30 Maart 2020

Comments

Post a Comment

Popular posts from this blog

Dag 48 van die grendelstaat

-
Dis nou regtig genoeg. Vandag het die afgelope 47 dae my net ingehaal soos 'n wafferse Usain Bolt terugvegpoging. Maar instede van my net verbysteek het hy my gepooitjie en toe met sy enorme nommer 15 spykerskoene herhaaldelik oor my geloop en sommer 'n paar skoppe in my ribbes ingekry terwyl hy besig was met my. Sowat van 'n gemoedsbekakking het ek lanklaas in my lewe beleef. Die hele tydperk wat ons ingekerker was bly ek nog 'n glimlag van êrens af opdiep, bly ek soekend na positiewe dinge wat my kan opbeur, en kon ek grotendeels daarin slaag. Want dis nodig en ek is veronderstel om tough te wees en ek het darem 'n bed om in te slaap en kos in my maag en die son skyn en daar is memes met positiewe boodskappe en memes wat my vertel ek is basies net 'n klaende druipnat uilskuiken wat hopeloos te maklik kla want daar is soveel mense wat alles verloor het of niks het om mee te begin nie of wat soveel erger ly so as ek 'n ware man is sal ek net aanhou ...
Read more

Die Regte Rooikappie En Die Wolf

-
Eens op ‘n tyd was daar hierdie dogtertjie gewees wat in Feetjieland, reg langs die Towerwoud, gewoon het.  Eintlik was sy blond maar sy het heeldag met so ‘n rooi mussie op haar kop geloop met die gevolg dat almal in Feetjieland en die Towerwoud haar toe Rooikappie begin noem het.  Vreeslike fraai kind, en tog so lief vir haar Ouma. Ouma het in die nabygeleë Towerwoud gewoon, nie ver van die Houtkapper af nie want hulle twee het saans saam TV gekyk. Survivor was hoog op die lys want die bos was ook maar gevaarlik.  Een goeie dag kry Rooikappie toe ‘n sms van Ouma af waarin sy vra of sy nie asseblief vir haar ‘n paar goedjies uit die dorp sal saambring nie, en dan eet sy sommer middagete saam met Ouma en die Houtkapper. Ouma voel bietjie siekerig en lê bietjie in die bed. So gesê so gedaan, en Rooikappie is toe daar weg na die naaste – en enigste – Spaar in die dorp. Spaar, want in Feetjieland kry jy nie ‘n franchise van die meer bekende winkel groep in menseland ...
Read more