Dag 61 van die grendelstaat

-
Is die skielike kouefront 'n teken dat Tops solank hulle yskaste aangesit het?
Gaan kerke oopmaak of moet jy jou kollekte steeds met die koerier stuur?
Gaan ons 1 Junie na vlak 3 toe of gaan ons warm gloede ons die graad laat druip en ons bly op vlak 4?
Besef die agbare minister dat die warm kolle dalk is omdat mense so de moer in is?
Mag net die gelowiges saamtrek? Moet die ongelowiges steeds tuisbly?
Gaan nagmaal in die toekoms ie laaste lag hê en met pynappelbier bedien word?
As 50 mense mag kerk toe gaan mag ons seker by vriende bymekaarkom vir 'n braai? Ons gaan minder as 10 wees Edelagbare, en ook nie op die strand nie. Ons sal mos nie lieg nie. Nee nee Frikkie is reeds in kennis gestel dat hy nie welkom is as hy sy branderplank saambring nie.
Gaan rokers toegelaat word om bymekaar te kom om te bid vir sigarette?
Gaan daar 'n naam uitgedink word vir manlike Karen's of sal hulle net Meneer Karen gedoop word?
Gaan kinders skool toe of gaan hulle ouers Tops leegkoop sodat hulle kan vergeet van hulle wroeging?
Het ons 'n Eerste Minister of 'n President?
Wat rook die Eerste Minister en kan ons ook kry? En gaan sy ons met haar volgende inligtingsessie weer deur die ore werk? Mag ons die keer net eers smeermiddel koop?
Groot asseblief.
Wie het die President se hare gesny en is sy haarkapper nog op vrye voet?
Is SA se grendelstaat die langste in die wêreld?
So baie vrae. So min antwoorde. Klink min of meer normaal vir dag 61 of hoe.
Vandag, in 1865, in Shreveport, Louisiana, gee die laaste staande leër van die Konfederasie oor na 4 bloedige jare van siviele oorlog in Amerika. Corona beter nie so lank vat nie. Ek hoop hy lees die.
Die slag by Dunkirk. Tussen 26 Mei en 4 Junie 1940 word ongeveer 338000 soldate ontruim vanaf die strande. Ellelange rye soldate het die kaai en strande vir dae toegepak, feitlik heeltyd onder vyandelike vuur en grofgeskut.
In 2020 staan honderde duisende Suid Afrikaners maklik 'n dag lank per keer in kilometers lange rye in die hoop dat hulle gelukkig genoeg sal wees om daardie dag 'n kospakkie te ontvang en nie honger gaan slaap nie.
Die geskiedenis het soms 'n wrang sin vir humor. Nes sommige ministers.
Hoe groot moet jou erf wees om genoeg tabak te groei vir die buurt? Ek vra namens 'n vriend.
Riaan Coetzee
Kopiereg
26 Mei 2020

Comments

Post a Comment

Popular posts from this blog

Dag 48 van die grendelstaat

-
Dis nou regtig genoeg. Vandag het die afgelope 47 dae my net ingehaal soos 'n wafferse Usain Bolt terugvegpoging. Maar instede van my net verbysteek het hy my gepooitjie en toe met sy enorme nommer 15 spykerskoene herhaaldelik oor my geloop en sommer 'n paar skoppe in my ribbes ingekry terwyl hy besig was met my. Sowat van 'n gemoedsbekakking het ek lanklaas in my lewe beleef. Die hele tydperk wat ons ingekerker was bly ek nog 'n glimlag van êrens af opdiep, bly ek soekend na positiewe dinge wat my kan opbeur, en kon ek grotendeels daarin slaag. Want dis nodig en ek is veronderstel om tough te wees en ek het darem 'n bed om in te slaap en kos in my maag en die son skyn en daar is memes met positiewe boodskappe en memes wat my vertel ek is basies net 'n klaende druipnat uilskuiken wat hopeloos te maklik kla want daar is soveel mense wat alles verloor het of niks het om mee te begin nie of wat soveel erger ly so as ek 'n ware man is sal ek net aanhou ...
Read more

Die Regte Rooikappie En Die Wolf

-
Eens op ‘n tyd was daar hierdie dogtertjie gewees wat in Feetjieland, reg langs die Towerwoud, gewoon het.  Eintlik was sy blond maar sy het heeldag met so ‘n rooi mussie op haar kop geloop met die gevolg dat almal in Feetjieland en die Towerwoud haar toe Rooikappie begin noem het.  Vreeslike fraai kind, en tog so lief vir haar Ouma. Ouma het in die nabygeleë Towerwoud gewoon, nie ver van die Houtkapper af nie want hulle twee het saans saam TV gekyk. Survivor was hoog op die lys want die bos was ook maar gevaarlik.  Een goeie dag kry Rooikappie toe ‘n sms van Ouma af waarin sy vra of sy nie asseblief vir haar ‘n paar goedjies uit die dorp sal saambring nie, en dan eet sy sommer middagete saam met Ouma en die Houtkapper. Ouma voel bietjie siekerig en lê bietjie in die bed. So gesê so gedaan, en Rooikappie is toe daar weg na die naaste – en enigste – Spaar in die dorp. Spaar, want in Feetjieland kry jy nie ‘n franchise van die meer bekende winkel groep in menseland ...
Read more