Dag 113 van die grendelstaat

-
Oom Cyril wil alweer met ons praat.
Ek smeer solank my gat vet. Ek stel voor julle doen ook. As die president deesdae met ons praat is dit gewaarborg dat ons die skuld vir iets gaan kry. Dalk is ons gelukkig en dis net vir 'n virus wat nie onder beheer kan gekry word nie.
Die feit dat die regering nie in staat is om 'n duikkompetisie vir 'n graad een klassie te reël nie is nie ter sprake nie. Ons vat net ons pak en maak gereed om nog voorregte op te gee. Buks, staan haaks, soos Ou Paal altyd uitgeroep het toe ek in die hoërkskool was en ons nie huiwerk gedoen het nie. In tipiese robuuste Suid Afrikaanse maniere om vrees en spanning te verwerk, doen ons intussen weddenskappe op sosiale media oor wat dit sal wees.
Geen groente? Geen vrugte? Geen seks? Geen Netflix? Geen internet? Geen poep in openbare plekke net ingeval hulle waarnemings oor die virus se verspreidingspotensiaal 'n strontstorie was?
Die spanning loop hoog.
Ons weet reeds dat hy niks sal noem oor die 500 biljoen se stelery nie. Of oor die feit dat misdaad al meer hande uit ruk soos wat meer industrieë vernietig word en meer en meer mense honger en desperaat raak nie. Geen weddenskappe is nodig om te bespiegel of hy dalk, net dalk, sal bevestig dat die regering met onmiddellike ingang bedank nie. Mens mag mos maar hoop, of hoe.
Dalk sal hy vanaand weer probeer om ons te vermaak en 'n ietsie met sy masker aanvang net voor hy klaarmaak om ons aandag af te lei dat ons dink hy is oulik, en dan so half onderlangs byvoeg dat Mammie Zuma ons na die naweek sal vertel van wat nou eintlik gaan gebeur.
Ek gaan nou maar vinnig al die Netflix rolprente deurdraf wat ek nog wou kyk. Net ingeval hulle dalk op dit besluit het vir hierdie rondte. Ek wil nie weer met my broek op my enkels gevang word soos met die nuwe drankverbod nou die dag nie!
Hy sal ook niks kwytraak oor hulle herfinansieringsplanne vir SAA met Suid Afrikaners se pensioengeld nie. Ons moet seker vir Pravin daaroor vra. Ek is seker hulle was almal hoog toe hulle hierdie een uitgedink het.
Ek gaan nou maar koffie drink. Grotendeels want my drank is regtig klaar so ek val maar terug op wat beskikbaar is.
Riaan Coetzee
Kopiereg
23 Julie 2020

Comments

Post a Comment

Popular posts from this blog

Dag 48 van die grendelstaat

-
Dis nou regtig genoeg. Vandag het die afgelope 47 dae my net ingehaal soos 'n wafferse Usain Bolt terugvegpoging. Maar instede van my net verbysteek het hy my gepooitjie en toe met sy enorme nommer 15 spykerskoene herhaaldelik oor my geloop en sommer 'n paar skoppe in my ribbes ingekry terwyl hy besig was met my. Sowat van 'n gemoedsbekakking het ek lanklaas in my lewe beleef. Die hele tydperk wat ons ingekerker was bly ek nog 'n glimlag van êrens af opdiep, bly ek soekend na positiewe dinge wat my kan opbeur, en kon ek grotendeels daarin slaag. Want dis nodig en ek is veronderstel om tough te wees en ek het darem 'n bed om in te slaap en kos in my maag en die son skyn en daar is memes met positiewe boodskappe en memes wat my vertel ek is basies net 'n klaende druipnat uilskuiken wat hopeloos te maklik kla want daar is soveel mense wat alles verloor het of niks het om mee te begin nie of wat soveel erger ly so as ek 'n ware man is sal ek net aanhou ...
Read more

Die Regte Rooikappie En Die Wolf

-
Eens op ‘n tyd was daar hierdie dogtertjie gewees wat in Feetjieland, reg langs die Towerwoud, gewoon het.  Eintlik was sy blond maar sy het heeldag met so ‘n rooi mussie op haar kop geloop met die gevolg dat almal in Feetjieland en die Towerwoud haar toe Rooikappie begin noem het.  Vreeslike fraai kind, en tog so lief vir haar Ouma. Ouma het in die nabygeleë Towerwoud gewoon, nie ver van die Houtkapper af nie want hulle twee het saans saam TV gekyk. Survivor was hoog op die lys want die bos was ook maar gevaarlik.  Een goeie dag kry Rooikappie toe ‘n sms van Ouma af waarin sy vra of sy nie asseblief vir haar ‘n paar goedjies uit die dorp sal saambring nie, en dan eet sy sommer middagete saam met Ouma en die Houtkapper. Ouma voel bietjie siekerig en lê bietjie in die bed. So gesê so gedaan, en Rooikappie is toe daar weg na die naaste – en enigste – Spaar in die dorp. Spaar, want in Feetjieland kry jy nie ‘n franchise van die meer bekende winkel groep in menseland ...
Read more