Dag 29 van die grendelstaat

-
Die aarde se diere geniet die tydperk terdeë.
Oral hoor en sien ons berigte van wilde diere wat as 'n norm mense sover as moontlik vermy (met goeie rede) wat dorpe en stede binnevaar.
Coyotes in Chicago en San Francisco se middestede. Pumas in Santiago. Boerbokke in Llandudno in Wallis. Troppe ape in Indië wat huise binnegaan en yskaste plunder. Op strande in verskeie plekke kon seeskilpaaie vir die eerste keer in dekades eiers lê sonder om gesteur te word.
Kangeroes spring rond in stede in Australië. Dolfyne en seevoëls swem in die kanale in Venesië. In Tel Aviv het 'n trop jakkalse hulleself tuisgemaak in 'n lokale park in die stad. In ons eie Kruger Wildtuin het leeus en troppe diere begin werk aan hulle voorgee op die Skukuza golfbaan.
In die Ooste van Pretoria het 'n reuse koedoebul doodluiters in iemand se tuin gemaklik geraak. In Parys, die een met die Eifel toring, het eendfamilies rustig in die stil strate rondgewaggel tot groot vermaak van die ingekerkerde burgers.
In Christchurch in Kiwiland hop hase heel gemaklik in die stad rond en poue pronk voor winkelvensters in Ronda in Spanje. In Nara in Japan is inheemse Sika takbokke gewaar in voorheen volgepakte strate.
En in London loop Mr Bean in stil strate rond en wonder wat aangaan.
Watter heerlike ironie om te dink die diere is besig om vir ons te staar agter ons tralies.
Terug in Suid Afrika is ons nog besig om te probeer verstaan wie van ons gelukkig genoeg is dat die regering goedkeuring gegee het vir hulle om weer te mag inkomste begin verdien maar ons stry klaar onder mekaar oor die President se masker.
Die meeste blyk die humor daarin te sien, en ek glo selfs hy sit vanoggend by sy ontbyttafel en giggel vir die memes wat binne sekondes begin vloei het soos water. En onwillekeurig is daar diegene wat gebelgd voel dat mense durf waag die spot dryf met die hoogste boom in die land.
Ongeag die kamp waarin jy val, jy moet toegee dat dit ironies is dat die bes bewaarde deel van 'n belangrike toespraak die masker is.
Sela
Riaan Coetzee
Kopiereg
24 April 2020

Comments

Post a Comment

Popular posts from this blog

Dag 48 van die grendelstaat

-
Dis nou regtig genoeg. Vandag het die afgelope 47 dae my net ingehaal soos 'n wafferse Usain Bolt terugvegpoging. Maar instede van my net verbysteek het hy my gepooitjie en toe met sy enorme nommer 15 spykerskoene herhaaldelik oor my geloop en sommer 'n paar skoppe in my ribbes ingekry terwyl hy besig was met my. Sowat van 'n gemoedsbekakking het ek lanklaas in my lewe beleef. Die hele tydperk wat ons ingekerker was bly ek nog 'n glimlag van êrens af opdiep, bly ek soekend na positiewe dinge wat my kan opbeur, en kon ek grotendeels daarin slaag. Want dis nodig en ek is veronderstel om tough te wees en ek het darem 'n bed om in te slaap en kos in my maag en die son skyn en daar is memes met positiewe boodskappe en memes wat my vertel ek is basies net 'n klaende druipnat uilskuiken wat hopeloos te maklik kla want daar is soveel mense wat alles verloor het of niks het om mee te begin nie of wat soveel erger ly so as ek 'n ware man is sal ek net aanhou ...
Read more

Die Regte Rooikappie En Die Wolf

-
Eens op ‘n tyd was daar hierdie dogtertjie gewees wat in Feetjieland, reg langs die Towerwoud, gewoon het.  Eintlik was sy blond maar sy het heeldag met so ‘n rooi mussie op haar kop geloop met die gevolg dat almal in Feetjieland en die Towerwoud haar toe Rooikappie begin noem het.  Vreeslike fraai kind, en tog so lief vir haar Ouma. Ouma het in die nabygeleë Towerwoud gewoon, nie ver van die Houtkapper af nie want hulle twee het saans saam TV gekyk. Survivor was hoog op die lys want die bos was ook maar gevaarlik.  Een goeie dag kry Rooikappie toe ‘n sms van Ouma af waarin sy vra of sy nie asseblief vir haar ‘n paar goedjies uit die dorp sal saambring nie, en dan eet sy sommer middagete saam met Ouma en die Houtkapper. Ouma voel bietjie siekerig en lê bietjie in die bed. So gesê so gedaan, en Rooikappie is toe daar weg na die naaste – en enigste – Spaar in die dorp. Spaar, want in Feetjieland kry jy nie ‘n franchise van die meer bekende winkel groep in menseland ...
Read more