Dag 79 van die grendelstaat

-
Standbeelde het nou genoeg gehad van hierdie balhorigheid en veg terug!
Van oral af begin wilde gerugte opduik van standbeelde wat hulle verset teen aanvallers wat hulle wil beskadig. Daar het selfs foto's op die internet begin verskyn, wat veroorsaak het dat Antie Fa se mediaskakelbeampte galgebraak het op Twitter - Ons Het Nie Opgeteken Vir Hierdie Geweld Nie, Daar Is Plek Vir Ons Almal In Chaz!
Die Internasionale Voorsitter van die Standbeeldvereniging, Meneer A.M. Beeld, het glo net gelag en gefluister dat hulle nog net besig is om op te warm. Dit vat blykbaar 'n tydjie vir 'n standbeeld om op te warm, veral die wat uit marmer gemaak is.
Toe Antie Fa hiervan te hore kom het hulle sosiale media met 'n tsunami video's van gillende, huilende lede toegegooi om duidelik te wys hoe verontreg hulle hieroor voel. Chaz het noodberigte uitgestuur vir soveel moontlik ekstra toiletpapier omdat hulle burgers hulleself hieroor beskeit.
Die Krygsheer in Beheer het dit so ernstig opgeneem dat hy glo beplan om die naam te wysig. CHAZ (Capitol Hill Autonomous Zone) gaan glo nou CHOP (Capital Hill Occupied Zone) word. As dit in SA moes gebeur sou dit SKAAPCHOP gewees het. Die Spesmagte het net gelag hieroor en goedkeurend vir mekaar gesê "Ja swaer, hulle gaan beslis afchop as ons daar moet in."
Hulle moet darem net versigtig wees. Chaz, of Chop, het hulle eie spesmag begin bymekaarmaak. Verskeie sosiale media rekeninge wat verband hou hiermee het gemeld dat alle Call Of Duty spelers vanmiddag om 18:00 moet aanmeld vir 'n vergadering by die voormalige polisiekantore wat hulle beset het, en dat hulle baie Red Bull en springmielies moet saambring en beplan vir 'n lang spel. Ek meen geveg!
Mense wat meer van die goed weet as ek beweer dat Corona in Sjina begin het as 'n virus. Van daar is dit oor Europa toe as 'n pandemie, en het in SA gevestig as 'n reuse kontant besigheid.
Intussen weet die Minister van EkWeetBoggerol, Minister Zulu, steeds nie dat die grendelstaat 'n totale slagveld geskep het vir armes nie. Om die waarheid te sê, sy was geskok om te besef sy bly in Suid Afrika.
Standbeeldjie vir haar?
Riaan Coetzee
Kopiereg
16 Junie 2020





Comments

Post a Comment

Popular posts from this blog

Dag 48 van die grendelstaat

-
Dis nou regtig genoeg. Vandag het die afgelope 47 dae my net ingehaal soos 'n wafferse Usain Bolt terugvegpoging. Maar instede van my net verbysteek het hy my gepooitjie en toe met sy enorme nommer 15 spykerskoene herhaaldelik oor my geloop en sommer 'n paar skoppe in my ribbes ingekry terwyl hy besig was met my. Sowat van 'n gemoedsbekakking het ek lanklaas in my lewe beleef. Die hele tydperk wat ons ingekerker was bly ek nog 'n glimlag van êrens af opdiep, bly ek soekend na positiewe dinge wat my kan opbeur, en kon ek grotendeels daarin slaag. Want dis nodig en ek is veronderstel om tough te wees en ek het darem 'n bed om in te slaap en kos in my maag en die son skyn en daar is memes met positiewe boodskappe en memes wat my vertel ek is basies net 'n klaende druipnat uilskuiken wat hopeloos te maklik kla want daar is soveel mense wat alles verloor het of niks het om mee te begin nie of wat soveel erger ly so as ek 'n ware man is sal ek net aanhou ...
Read more

Die Regte Rooikappie En Die Wolf

-
Eens op ‘n tyd was daar hierdie dogtertjie gewees wat in Feetjieland, reg langs die Towerwoud, gewoon het.  Eintlik was sy blond maar sy het heeldag met so ‘n rooi mussie op haar kop geloop met die gevolg dat almal in Feetjieland en die Towerwoud haar toe Rooikappie begin noem het.  Vreeslike fraai kind, en tog so lief vir haar Ouma. Ouma het in die nabygeleë Towerwoud gewoon, nie ver van die Houtkapper af nie want hulle twee het saans saam TV gekyk. Survivor was hoog op die lys want die bos was ook maar gevaarlik.  Een goeie dag kry Rooikappie toe ‘n sms van Ouma af waarin sy vra of sy nie asseblief vir haar ‘n paar goedjies uit die dorp sal saambring nie, en dan eet sy sommer middagete saam met Ouma en die Houtkapper. Ouma voel bietjie siekerig en lê bietjie in die bed. So gesê so gedaan, en Rooikappie is toe daar weg na die naaste – en enigste – Spaar in die dorp. Spaar, want in Feetjieland kry jy nie ‘n franchise van die meer bekende winkel groep in menseland ...
Read more