Dag 73 van die grendelstaat

-
Uiteindelik het ek 'n masker wat ek met graagte dra.
Sodat almal kan sien wat dink ek hiervan. Dit het aandag getrek in die winkels, dis verseker. Meeste loer so skalks soos wanneer 'n man 'n mooi vrou sien maar jy wil nie openlik staar dat sy sien jy kyk nie. Ander kyk direk en lag, duidelik deel hulle die sentiment.
Iemand het onderlangs gemompel "gmf, sies!" so in die verbystap. Toe mompel ek terug - maar nie onderlangs nie - "Dankie Karen..." en ek vermoed haar nekkie gaan styf wees omdat sy hom so vinnig omgeruk het.
Almal dra maskers oor hulle maskers. Beide myne is nou net presies dieselfde.
Vandag is daar 'n hofsaak aan oor tabak. Teen onse minister van wierook. Sodat die hof kan bepaal wie mag rook, of nie. Dalk moet ek eerder sê - wie nogsteeds nie. Want SA is nie net 'n bodemlose put nie, dis 'n rooklose bodemlose put.
Ek het vandag by die drankwinkel ingeloer om 'n ietsie te probeer kry en was verbaas om te sien hoe leeg die plek is. Toe onthou ek van die storie wat die afgelope paar dae die rondte gedoen het dat die regering, lees - DIE minister - drank weer gaan stop. Blyk dat dit net 'n kwaadwillige storie was, waarskynlik deur een of ander drankwinkel eienaar begin wat gou vir hulle 'n Swart Vrydag wou reël. Dit het gewerk ook! Die voorraad wat wel beskikbaar is staan soos verlate eilandjies in 'n oseaan daar rond en hoop beteuterd iemand is dors genoeg om hulle ook te koop. Ek was egter nie so dors nie.
En steeds skrei die dubbelstandaarde ten hemele. Jy mag marsjeer en protesteer as jy de moer in is, maar verder moet jy streng hou by sosiale afstandhouding. Gister het die Rooi Oorpakke - nee, nee nie die ouens wat jou uitsmyt as jy op die verkeerde plek bly nie, ek praat van die ouens met die duur skoene en Rolex horlosies by hulle rooi oorpakke - opgeruk na Amerikaanse ambassades om hulle woede uit te druk.
En gister, op dieselfde dag, het die Gestapo in hulle hordes opgeruk na die Dainfern Golfbaan omdat die gewaag het oop te maak onder streng maatreëls om te verseker spelers en klublede hou afstand en was hande en dies meer. Slegs professionele spelers mag speel, die res mag net op tv kyk hoe hulle speel anders gaan hulle Corona kry. Ons haal ons hoed af en hou 'n oomblik van stilte om soveel dapperheid aan die kant van die blouligbrigade te herdenk.
Ek merk die matrieks van een van die land se voorste seunsskole het 'n lang lys eise opgestel en aan die skool deurgegee. Maar nêrens sien ek hulle soek 2 uur lange pouses en bier by die snoepie nie? Kan die manne dan nie meer ordentlik reël nie??
Al wat ek eis is minder grys hare.
Maar my eis het beslis in iemand se verdomde asdrom beland.
Riaan Coetzee
Kopiereg
9 Junie 2020


Comments

Post a Comment

Popular posts from this blog

Dag 48 van die grendelstaat

-
Dis nou regtig genoeg. Vandag het die afgelope 47 dae my net ingehaal soos 'n wafferse Usain Bolt terugvegpoging. Maar instede van my net verbysteek het hy my gepooitjie en toe met sy enorme nommer 15 spykerskoene herhaaldelik oor my geloop en sommer 'n paar skoppe in my ribbes ingekry terwyl hy besig was met my. Sowat van 'n gemoedsbekakking het ek lanklaas in my lewe beleef. Die hele tydperk wat ons ingekerker was bly ek nog 'n glimlag van êrens af opdiep, bly ek soekend na positiewe dinge wat my kan opbeur, en kon ek grotendeels daarin slaag. Want dis nodig en ek is veronderstel om tough te wees en ek het darem 'n bed om in te slaap en kos in my maag en die son skyn en daar is memes met positiewe boodskappe en memes wat my vertel ek is basies net 'n klaende druipnat uilskuiken wat hopeloos te maklik kla want daar is soveel mense wat alles verloor het of niks het om mee te begin nie of wat soveel erger ly so as ek 'n ware man is sal ek net aanhou ...
Read more

Die Regte Rooikappie En Die Wolf

-
Eens op ‘n tyd was daar hierdie dogtertjie gewees wat in Feetjieland, reg langs die Towerwoud, gewoon het.  Eintlik was sy blond maar sy het heeldag met so ‘n rooi mussie op haar kop geloop met die gevolg dat almal in Feetjieland en die Towerwoud haar toe Rooikappie begin noem het.  Vreeslike fraai kind, en tog so lief vir haar Ouma. Ouma het in die nabygeleë Towerwoud gewoon, nie ver van die Houtkapper af nie want hulle twee het saans saam TV gekyk. Survivor was hoog op die lys want die bos was ook maar gevaarlik.  Een goeie dag kry Rooikappie toe ‘n sms van Ouma af waarin sy vra of sy nie asseblief vir haar ‘n paar goedjies uit die dorp sal saambring nie, en dan eet sy sommer middagete saam met Ouma en die Houtkapper. Ouma voel bietjie siekerig en lê bietjie in die bed. So gesê so gedaan, en Rooikappie is toe daar weg na die naaste – en enigste – Spaar in die dorp. Spaar, want in Feetjieland kry jy nie ‘n franchise van die meer bekende winkel groep in menseland ...
Read more