Dag 72 van die grendelstaat

-
Die keiser is kaal!
So ook die rot wat ek in die week ontmoet het. Nee, nee 'n regte rot. Vier bene. Lang stert. Knaagtande. Snorbaarde soos 'n kat.
Nie 'n politikus nie.
Witrot. Maar heeltemal haarloos. Glad soos 'n babatjie se wangetjies. Met ronde rooi ogies soos 'n Ferrari se briekligte.
Die outjie storm letterlik uit sy hok uit en smeek vir aandag. Spring op, hol teen my arm op en hier staan ek en die rot en druk mekaar. En hy hou van 'n lekker rugkrap. Daai rooi briekliggies trek sommer so toe van lekkerkry.
In my dag des lewens het ek nie gedink ek sal met 'n rot staan en vry nie. Ek meen, wat is volgende - 'n restaurant in Parys??
Harry Potter. Is die mannetjie vir jou in groot moeilikheid! Nie eers Professor Dumbledore en die hele fakulteit van Hogwarts kan hom help nie. Wel, eintlik is dit JK Rowling. Nie Harry nie. Maar ek is seker sy wens sy kon op daai trein klim Hogwarts toe.
Twitter storm haar soos 'n wolkbreuk op 'n lekker sonskyndag. Sy het iets kwytgeraak wat die kwaaies kwaad gekry het. Nie dat dit deesdae moeilik is nie.
Toe vergeet hulle dadelik van protesoptogte en deel eers 'n bietjie haat met haar. Hulle het baie om te deel.
Sy voel waarskynlik angsbevange terwyl sy haar biljoene sit en tel.
Terwyl haar Twitter aanvallers parkering soek vir hulle besems sodat hulle 'n protesoptog kan hou.
Ek het vandag 'n belangrike ding besef wanneer dit kom by die behoorlike organisasie van jou badkamer.
Ek het geskeer vanoggend. Net so al om die gesig sodat die baard netjieser vertoon. Later moes ek 'n draai stap. En dit was waar ek toe die wysheid besef het van behoorlike organisasie.
As jy 'n uitreik operasie loods na die blik poepsprei om die nodige laventel partikels in aksie te kry terwyl jy in die spieël seker maak jy het vroeër 'n goeie taak verrig, en jy druk die spuitknop vir n lekker lang spuit terwyl jy die blik vervaard rondswaai om die heel beste distribusie te verseker en dis die skeerroom.... dan werk dinge skielik nie so lekker nie.
Fok.
Dit het 'n goeie halfuur geneem om skeerroom van alles af te kry.
Organiseer julle badkamers.
Leer hieruit.
Riaan Coetzee
Kopiereg
7 Junie 2020



Comments

Post a Comment

Popular posts from this blog

Dag 48 van die grendelstaat

-
Dis nou regtig genoeg. Vandag het die afgelope 47 dae my net ingehaal soos 'n wafferse Usain Bolt terugvegpoging. Maar instede van my net verbysteek het hy my gepooitjie en toe met sy enorme nommer 15 spykerskoene herhaaldelik oor my geloop en sommer 'n paar skoppe in my ribbes ingekry terwyl hy besig was met my. Sowat van 'n gemoedsbekakking het ek lanklaas in my lewe beleef. Die hele tydperk wat ons ingekerker was bly ek nog 'n glimlag van êrens af opdiep, bly ek soekend na positiewe dinge wat my kan opbeur, en kon ek grotendeels daarin slaag. Want dis nodig en ek is veronderstel om tough te wees en ek het darem 'n bed om in te slaap en kos in my maag en die son skyn en daar is memes met positiewe boodskappe en memes wat my vertel ek is basies net 'n klaende druipnat uilskuiken wat hopeloos te maklik kla want daar is soveel mense wat alles verloor het of niks het om mee te begin nie of wat soveel erger ly so as ek 'n ware man is sal ek net aanhou ...
Read more

Die Regte Rooikappie En Die Wolf

-
Eens op ‘n tyd was daar hierdie dogtertjie gewees wat in Feetjieland, reg langs die Towerwoud, gewoon het.  Eintlik was sy blond maar sy het heeldag met so ‘n rooi mussie op haar kop geloop met die gevolg dat almal in Feetjieland en die Towerwoud haar toe Rooikappie begin noem het.  Vreeslike fraai kind, en tog so lief vir haar Ouma. Ouma het in die nabygeleë Towerwoud gewoon, nie ver van die Houtkapper af nie want hulle twee het saans saam TV gekyk. Survivor was hoog op die lys want die bos was ook maar gevaarlik.  Een goeie dag kry Rooikappie toe ‘n sms van Ouma af waarin sy vra of sy nie asseblief vir haar ‘n paar goedjies uit die dorp sal saambring nie, en dan eet sy sommer middagete saam met Ouma en die Houtkapper. Ouma voel bietjie siekerig en lê bietjie in die bed. So gesê so gedaan, en Rooikappie is toe daar weg na die naaste – en enigste – Spaar in die dorp. Spaar, want in Feetjieland kry jy nie ‘n franchise van die meer bekende winkel groep in menseland ...
Read more