Dag 34 van die Grendelstaat

-
Gee vir hulle vibrators.
Aldus die minister.
Maar as jy klaar vanself bewe sal hulle jou los om jou eie ventilator vas te hou. Dis nou regtig die verskil tussen kom en gaan. Mens wonder of die vibreerventilators ook in allerlei kleure beskikbaar gaan wees net om die okkasie op te helder.
Winter is vinnig besig om die sosiale afstand beperkings te verbreek. Vir my beteken dit kouer water om in te swem terwyl ander in warm jassies rondloop en vir my kyk of ek mal is. Wat dalk nie onvanpas is nie – die hele Corona ding is beslis besig om hard te probeer om my gek te maak.
In die Vrystaat wys hooggeplaaste amptenare hoe goed hulle sosiale afstand verstaan deur ‘n hele reeks mense te kry wat almal bymekaar staan met geen virusveilige afstande nie net sodat 20 mense ‘n boodskap kan lewer wat perfek deur een kon afgelewer word. Business as usual.
Suid Afrikaners is kwaad - meestal vir mekaar. Al lag ons oor vibrator ventileerders. Wat dan sekerlik beteken ons is weer terug na normaal toe? Ek meen, kwaad vir mekaar is tog ons norm of hoe.
Die grootste aanlyn mini oorlog huidig – sosiale afstand dwing ons om slegs aanlyn slaags te raak – blyk te gaan oor of ons moet begin werk of aanhou sit en wag tot die regering eendag besluit ons mag weer probeer geld verdien.
Dis waarskynlik die vraag van die eeu, maar ons sal sekerlik eers oor ‘n dekade kan terugkyk en bepaal watter kamp reg was. Intussen spreek ons slegs ‘n nimmereindigende reeks persoonlike opinies uit – terwyl die gewonde ekonomie vinniger uitbloei as ‘n bottel sjampanje wanneer jy sy nek met ‘n swaard afkap. Uiteraard is ons almal se opinies korrek.
Volgens onsself natuurlik.
Die feit is dat ons effektief gyselaars is met geen vryhede meer nie. En dit is besig om mense oor die afgrond te dryf. Ons mag nie eers by vriende en familie kuier nie – hierdie afstand ding is veral besig om kontakmense gek te maak. Oornag het ons geval van burgers met vryheid tot tronkvoëls in ons eie huise met die enigste wettig toelaatbare vryheid die voorreg om elke dan en wan winkels toe te mag gaan om te koop wat die regering ons toelaat om te koop.
Oom Cyril – ons is regtig gatvol en ons wil ons reg uitoefen om geld te kan verdien. Maak dit gebeur.
Intussen is daar steeds mense wat dink die WHO was ‘n pop orkes in die 60’s. Lekker man.
Laastens ‘n baie relevante vraag – as al die Kubaanse dokters met SAA hier aangekom het, hoe gaan hulle by die huis kom?
Riaan Coetzee
Kopiereg
29 April 2020

Comments

Post a Comment

Popular posts from this blog

Dag 48 van die grendelstaat

-
Dis nou regtig genoeg. Vandag het die afgelope 47 dae my net ingehaal soos 'n wafferse Usain Bolt terugvegpoging. Maar instede van my net verbysteek het hy my gepooitjie en toe met sy enorme nommer 15 spykerskoene herhaaldelik oor my geloop en sommer 'n paar skoppe in my ribbes ingekry terwyl hy besig was met my. Sowat van 'n gemoedsbekakking het ek lanklaas in my lewe beleef. Die hele tydperk wat ons ingekerker was bly ek nog 'n glimlag van êrens af opdiep, bly ek soekend na positiewe dinge wat my kan opbeur, en kon ek grotendeels daarin slaag. Want dis nodig en ek is veronderstel om tough te wees en ek het darem 'n bed om in te slaap en kos in my maag en die son skyn en daar is memes met positiewe boodskappe en memes wat my vertel ek is basies net 'n klaende druipnat uilskuiken wat hopeloos te maklik kla want daar is soveel mense wat alles verloor het of niks het om mee te begin nie of wat soveel erger ly so as ek 'n ware man is sal ek net aanhou ...
Read more

Die Regte Rooikappie En Die Wolf

-
Eens op ‘n tyd was daar hierdie dogtertjie gewees wat in Feetjieland, reg langs die Towerwoud, gewoon het.  Eintlik was sy blond maar sy het heeldag met so ‘n rooi mussie op haar kop geloop met die gevolg dat almal in Feetjieland en die Towerwoud haar toe Rooikappie begin noem het.  Vreeslike fraai kind, en tog so lief vir haar Ouma. Ouma het in die nabygeleë Towerwoud gewoon, nie ver van die Houtkapper af nie want hulle twee het saans saam TV gekyk. Survivor was hoog op die lys want die bos was ook maar gevaarlik.  Een goeie dag kry Rooikappie toe ‘n sms van Ouma af waarin sy vra of sy nie asseblief vir haar ‘n paar goedjies uit die dorp sal saambring nie, en dan eet sy sommer middagete saam met Ouma en die Houtkapper. Ouma voel bietjie siekerig en lê bietjie in die bed. So gesê so gedaan, en Rooikappie is toe daar weg na die naaste – en enigste – Spaar in die dorp. Spaar, want in Feetjieland kry jy nie ‘n franchise van die meer bekende winkel groep in menseland ...
Read more